My Blog

Isa ka gabay para sa Paghi-ambitanay sang Pulong sa mga Katapo sang Urna sa mga Barangay sang Parokya sang Jaro.



Markos 9:2-10
Sa ikaduha nga Domingo sa Kwaresma, Tuig B

v2Sang makaligad ang anom ka adlaw, gindala ni Jesus si Pedro, si Santiago, kag si Juan upod sa iya sa isa ka mataas nga bukid nga silahanon lang. Samtang nagatan-aw sila, nagbalhin ang dagway ni Jesus, v3kag ang iya mga bayu nagmasilaw kag nagmaputi. Wala sing bisan sin-o sa kalibutan nga makapaputi sang bayu kaangay sini. v4Dayon nakita sang tatlo ka gintuton-an si Elias kag si Moises nga nagapakighambal sa kay Jesus. v5Si Pedro naghambal kag nagsiling kay Jesus, "Manunodlo, maayo gid nga yari kita diri. Mahimo kami sing tatlo ka tolda, isa para sa imo, isa para kay Moises, kag ang isa para kay Elias." v6Si Pedro kag ang iya mga kaupdanan kinulbaan gid sa bagay nga wala na sia makahibalo kon ano ang iya isiling.
v7Nagpakita ang isa ka panganod kag ginlandungan sila. Dayon may tingog nga nabatian gikan sa panganod, "Ini amo ang akon gid hinigugma nga Anak. Pamatii ninyo sia!" v8Sa gilayon nanghulonghulong sila, pero wala sila sing iban nga nakita luas lamang kay Jesus.
v9Sang nagadulhog sila sa bukid si Jesus nagmando sa ila, "Indi kamo magpanugid bisan kay sin-o sang inyo nakit-an, tubtob nga mabanhaw ang Anak sang Tawo."
v10Gintuman nila ang ginsiling ni Jesus, pero sang silahanon lang nagpinamangkutanay sila, "Ano ang kahulogan sining 'mabanhaw sia'?"


PAGPATPAT SANG MGA DINALAN

v2Sang makaligad ang anom ka adlaw,

Anom ka adlaw pagkatapos nga ginpanagna ni Jesus nga sia magaantus kag pagapatyon sa kamot sang mga Hudiyo. Anom man ka adlaw ang naglipas sang ginsaway ni Pedro si Jesus tungod kay indi sia makabatas nga ang Kristo maga-antus kag nian ginsingganan sia ni Jesus, "Magpalayo ka sa akon, Satanas, ang imo panghunahona iya sang tawo kag indi iya sang Dios!"

gindala ni Jesus si Pedro, si Santiago, kag si Juan upod sa iya sa isa ka mataas nga bukid nga silahanon lang.

Amo ini sila ang mga suod kag pinakamalapit nga mga apostoles sa kay Jesus. Sa masami sila nga tatlo ginadala ni Jesus sa mga labing daku nga hitabo sa iya kabuhi. Amo man ini sila ang pagadalhon ni Jesus sa tanuman sa Getsemani sa diin sia magapangamuyo kag magabalhas sing dugo sa iya pag-atubang sang iya kasakit kag kamatayon sa Krus.

sa isa ka mataas nga bukid nga silahanon lang.

Sa pagpangamuyo, si Jesus masami nagataklas sa bukid. Ang mga propetas nakabaton man sing pinasahi nga pagpahayag sa Dios sa bukid (Bukid sang Sinai kag Horeb, etc). Ang bukid simbolo sang pagpahayag sang Dios sang iya kaugalingon kag subong man ang simbolo kon sa diin ang tawo labing malapit kag mahirup sa Dios.

Samtang nagatan-aw sila, nagbalhin ang dagway ni Jesus,

Ang pagbalhin sang dagway isa na ka pagtan-aw sang pagbalhin sang dagway ni Kristo sa iya pagkabanhaw. Diri ginpakita na nga daan ni Jesus sa ila ang iya himaya pagkatapos nga sia mag-antus kag mapatay.

v3kag ang iya mga bayu nagmasilaw kag nagmaputi. Wala sing bisan sin-o sa kalibutan nga makapaputi sang bayu kaangay sini. V

Ang kaputi-on kag kasilaw ni Jesus wala sing kaangay sa sining kalibutan kag wala naggikan sa sini nga kalibutan. Ang katahom kag kaanyag sang iya himaya indi mapaathag sang mga tinaga.




4Dayon nakita sang tatlo ka gintuton-an si Elias

Si Elias amo ang tiglawas sang mga propetas.

kag si Moises nga nagapakighambal sa kay Jesus.

Ang tiglawas sang kasugoan.

Ang presensya sining duha ka tiglawas sang Daan nga Katipan nagapamatuod nga ang mga ginpanagna sa Santos nga Kasulatan nahatagan katumanan dira kay Jesus.

v5Si Pedro naghambal kag nagsiling kay Jesus, "Manunodlo, maayo gid nga yari kita diri. Mahimo kami sing tatlo ka tolda, isa para sa imo, isa para kay Moises, kag ang isa para kay Elias."

Luyag ni Pedro nga magpabilin sa sadto nga eskperyensya kag balatyagon, ano pa luyag niya nga maghimo sang tolda agod nga ang katahum sang iya nakita magapabilin sa iya panan-awan kag balatyagon.

v6Si Pedro kag ang iya mga kaupdanan kinulbaan gid

Kasubong man sini ang balatyagon sang mga babayi sa sang ginsingganan sila sang anghel nga ang Ginoo wala na didto sa iya lulubngan kundi sia nabanhaw.

sa bagay nga wala na sia makahibalo kon ano ang iya isiling.

Kasubong man sini ang balatyagon sining tatlo ka mga apostoles sang didto sila sa Getsemani sa gab-i sa pag-antus ni Jesus.

v7Nagpakita ang isa ka panganod kag ginlandungan sila.

Katulad sa mga pagpahayag sang Dios sa daan nga katipan, ang panganod nga nagalandong simbolo sang presensya sang Dios nga naga-upod kag nagapuyo upod kay Kristo.

Dayon may tingog nga nabatian gikan sa panganod, "Ini amo ang akon gid hinigugma nga Anak. Pamatii ninyo sia!"

Amo man ini ang tingog kay ginpanghambal sang si Kristo ginbunyagan ni Juan sa diin nagkunsad ang Espiritu Santo kay Jesus nga daw kasubong sang isa ka salampati.

v8Sa gilayon nanghulonghulong sila, pero wala sila sing iban nga nakita luas lamang kay Jesus.

Si Moises kag si Elias nadula kag si Kristo na lang ang nabilin. Ang tiglawas sang kasugoan kag tiglawas sang mga propetas naghatag sang ila lugar sa kay Kristo Jesus kay sa iya na sugod subong magahalin ang mga kasugoan kag sia ang magahambal para sa Dios nga Amay.

v9Sang nagadulhog sila sa bukid si Jesus nagmando sa ila, "Indi kamo magpanugid bisan kay sin-o sang inyo nakit-an, tubtob nga mabanhaw ang Anak sang Tawo."

Ini tanan – ang iya kasakit, kamatayon kag ang himaya mahangpan lamang sing bug-os sa iya pagkabanhaw.

v10Gintuman nila ang ginsiling ni Jesus, pero sang silahanon lang nagpinamangkutanay sila, "Ano ang kahulogan sining 'mabanhaw sia'?"

Ang mga gintuton-an nabudlay sa gihapon maghangop. Indi nila sa gihapon mahangpan kon ngaa si Kristo dapat pa mag-antus kag mapatay kag ugaling sia mabanhaw sa himaya.


Summary
Ini nga hitabo sa ebanghelyo suno kay San Markos ginakabig nga isa ka pagpabakod sa mga gintuton-an nga nagbatyag sing pagkapaslaw sa mga panagna ni Jesus nga sia maga-antus nga mapatay. Indi sila makahangop kon ngaa kinahanglan gid nga ang anak sang Dios, ang Mesias, ang Kristo maantus kag mapatay. Sa katilingban ni San Markos sa diin ini ginsulat, ini nga mga dinalan isa man ka pagpabakod sa ila sa tunga sang mga paghingabot kag pag-antus nga ila ginaagyan.

Ang paggamit ni San Markos sang pareho nga mga tinaga sa Pagbalhin sang Dagway ni Jesus sa Pagkabanhaw kag sa Getsemani nagapaathag nga ining duha ka bahin sa kabuhi ni Kristo indi mahamulag sa isa kag isa. Ang himaya nga iya madangtan indi mahamulag sa iya kasakit kag kamatayon. Ang kabuhi sang isa ka Kristiano isa ka kapierdihan sa sining kalibutan agod maagum niya ang tanan sa himaya nga wala sing katapusan.


Mga Pamangkot

1. Sa ano bala nga mga hitabo sa akon kabuhi nga ang akon pagtuo kay Kristo nangin kasubong sang isa ka pagkamatay sa sining kalibutan kag sa iya sini sahi sang pamatasan?

2. Sa ano nga mga hitabo sa akon kabuhi nga ang saad na gid lang ni Kristo nga himaya sa katapusan sang panahon nangin akon paglaum nga ginahuptan? Paano ining saad nagpabakod sa akon?

3. Katulad kay Pedro naagyan ko man bala ang katahap kag katamad sa pagpanaog gikan sa bukid sang himaya kag kalipay? Ano karon nga mga hilikuton, panghangkat ukon katungdanan sa kabuhi nga akon ginakahadlukan nga atubangon, ukon ginapangatubang nga may mga pangduha-duha kag pagpang-alang-alang?

4. Paano ako nagpabakod kag nangin paglaum sa akon panimalay kag sa akon katilingban sa tion sang mga pag-antus kag kapipit-an?


(Sources: Parish of St. Charles Borromeo: Bible Study, www.homilies.com/homilies_sunday/homilist_st_charles.html.
Guillemette, Nil: A Kingdom for All, Synoptics – Sunday Readings. Makati, St. Paul Publications, 1988)