My Blog

Marso 9, 1440
Sia natawo sa isa ka manggaranon nga mag-asawa nga Italiano sa Roma. Sang napulo kag isa ang iya edad nagdesisyon sia nga magmadre.Apang sa sulod sang duha ka tuig ginpakasal sia sang iya mga ginikanan kay Lorenzo Ponziano, pangulo sang papal troops sa Roma. Nanginmalipayon ang ila pag-asawahay bisan pa nga patigayon lang yadto nga kasal sang iya mga ginikanan. Naglawig sing kap-atan (40) ka tuig ang ila pag-upod. Napatyan sila sang anum ka kabataan sang matabo ang daku peste (plague). Wala yadto nga hitabo nagpalingkang sang pagtuo nila nga mag-asawa sa baylo nagtubo pa gid gani ang ila sa pagkabalaka sa mga imol. Ila gintinguha-an nga makahatag sang bulig para sa ila kinahanglanon.

Sadto nga tiempo may nagaluntad nga pag-inaway sa tunga sang Santo Papa kag sa mga naga-oponer sini (anti-popes). Sa bahin ni Lorenzo isa sia sang mga alagad sang Santo Papa. Apang tungod ara sia sa patag-awayan sa pagpangapin sang Santo Papa kag wala pirme sa ila, kalabanan sang iya pagkabutang nagkalaguba. Nagpauli sia nga pilason. Gintatap sia ni Francesca apang napatay ini sang tuig 1436.

Sa pahanugot sadto sang iya bana nagpaidalom sia sa kabuhi sang pagpangamuyo (life of contemplation). May ara sia nga bugay (gifts) nga makakita sang mga langitnon nga mga personas, makahimo man sia sing milagro, makakita sang iya angel nga manugbantay, may panan-awan (vision) sia sang purgatorio kag impyerno, kag sia man ang nagtagna nga matapos gid ang bangigay sang simbahan (Western Schism). Mahibal-an man niya ang sekreto sang konsensiya sang tao kag iya mabatyagan kon may ara nga plano ang yawa sa sulod sang iya konsensiya. Nakilal-an sia sang tanan sang iya pagka mapainubuson kag wala huyog sa kalibutanon nga butang. Matinumanon sia kag mapinasensyahon.

Nagpatindog sia sang hospital pinaagi sa pagbagligya sang iban nga kadutaan sang iya pamilya. Sang Agosto 15, 1425, gintukod niya ang Oblates of Mary, para sa kababaenhan kag gin-aprobahan ni Pope Eugene IV sang Julyo 4, 1433. Napatay sang anyo 1440. Subong ginatawag na ining kongregasyon niya nga Oblates of Saint Frances of Rome.
Sang Mayo 9, 1608 gincanonized siya ni Pope Paul V. Gindeklarar sia ni Pope Pius XI sang1925 bilang patron sang mga drivers tungod may sugilanon nga may angel nga nagasuga sang iya dalan samtang siya nagapanakayon agud maluas sia sa katalagman.
Pamalandong:
Ang pagtuo isa ka malahalon nga regalo sang Dios sa aton. Tungod gani sining pagtuo, si Sta. Francesca nagdesisyon sa pag-alagad sa Dios sang naga edad pa lang sia sing napulo’g isa. Tungod sang pagtuo ginpasulabi niya ang Dios sangsa kalibutanon nga manggad.
Nangin matinumanon man sia sa iya mga ginikanan sang iya pagpakasal kay Lorenzo. Sang matabo ang daku nga trahedya sa iya panimalay (pagkapatay sang anum nila ka kabataan) wala gid madula ang iya pagtuo sa Dios. Buhi gihapon ang paglaum sa iya tagipusuon. Sa baylo nagtubo sa iya ang daku nga pagkabalaka sa mga imol. Labi nga nagbaskog ang iya pagtuo sa Dios.

Masami sia nga nagapangamuyo. Wala gid sia nagabulag sa Dios. Ginahatagan niya sing tinion ang Dios.

Mapinasensyahon sia kag mapainubuson. Puno sing pagpaubos nga nagaserbisyo sa mga tao kag nangin mapinasensyahon man sia sa ila. Sugo sang gugma kag kaalwan nga yara sa iya tagipusuon, ginbaligya niya ang iban nila nga kadutaan kag ginpatindog sang ospital. Bug-os ang kaugalingon nga ginhatag ang serbisyo sa mga tao nga wala sing ginapaabot nga kabayaran, voluntaryo ang kaalwan kag kaayo.

O Sta. Francesca, buligi kami nga masunod namon ining tatlo ka virtudes (3 theological virtues), pagtuo, paglaum, paghigugma (charity), nga nakita namon sa imo kabuhi. Kabay nga sa imo pagpatunga para sa amon, mapangamuyuan mo sa Mahal nga Dios nga kami: magmangin mabakog sa amon pagtuo, magpabilin nga nagadabdab ang amon paglaum nga makaabot sa duog nga gintigana sang Mahal nga Dios, makahangop kag makabatyag nga si Kristo Jesus indi malayo kundi ara Sia sa kada isa kag isa sa amon. Agud sa sini nga paagi mapabatyag namon ang paghigugma sa tagsa-tagsa ka Kristo nga makita o masugata namon. Magmaalwan ang amon tagipusoon sa pagbulig sinang makaluluoy nga Kristo nga nagabakho sa kaimolon kag inhustisya. Amen.